पुस्तक विमोचनमा ‘उध्रेको चोली’
जेठ, काठमाडौं । पुस्तक विमोचनमा उध्रेको चोली ? सुन्दा अनौठो लाग्न सक्छ । तर, अनौठो नमाने हुन्छ । काठमाडौंको भृकुटीमण्डपमा आयोजित १७ औं पुस्तक मेलाको समापनको दिन उध्रेको चोलीलगायतका गीतहरुको गुन्जनसँगै नयाँ पुस्ताका दश जना लेखकहरुको पहिलो प्रेमिल अनुभव समेटिएको पुस्तक ‘फस्ट लभ’ सार्वजनिक गरियो । हरेक पुस्तकको प्रचारमा केही नयाँपन दिँदै आएको फाइनपि्रन्टले इन्दिरा जोशी, धमेन्द्र सेवांग, हेमन्त राना र सुवानी मोक्तानलाई स्टेजमा उतारेर पुस्तक विमोचन गराउँदा भृकुटीमण्डपमा आइपुगेका पुस्तकप्रेमीहरुले अनौठो माने ।पुस्तक विमोचनपछि स्टेजमा आएका हेमन्त रानाले आफ्नो लोकपि्रय गीत लैजा ए…. लगायतका गीत सुनाए । त्यसपछि आएकी सुवानी मोक्तानले आमा कुन्ती मोक्तानको झल्को दिलाउँदै पहिलो माया यस्तै हो…. र थाहा छ…. गाइन् । जाँदाजाँदै उनले नेपाली लेखकहरुलाई प्रोत्साहन गरौं, नेपाली पुस्तक पढौं भनेर आफ्ना फ्यानहरुसँग आग्रह गरिन् ।
त्यसपछि स्टेजमा आएका धर्मेन्द्र सेवांगले हेर्दा राम्रो माछापुछ्रे, रेसम फिरिरी आदि गाएर दर्शकहरुलाई जुरुक्कै बनाए । नेपालमा पुस्तकप्रेमीहरु बढेको देखेर असाध्यै खुसी लागेको बताउँदै उनले दर्शकलाई पुस्तक किन्न प्रोत्साहित समेत गरे । त्यसपछि आएकी स्टेज क्वीन गायिका इन्दिरा जोशीले युवा दर्शकहरुलाई भुतुक्कै बनाइन् । उनले सानो माया धोका बन्यो…. र चौबन्दी चोली अनि रातो घाँगर लगायतका गीत गाइन् । धमेन्द्रसँगै उनले उध्रेको चोली छ है गाउन थालेपछि दर्शकको हुटिङले भृकुटीमण्डप गुञ्जयमान भयो । स्टेज प्रस्तुतिअघि ‘फष्ट लभ’का लेखकहरुका तर्फबाट बोल्दै सिवानीसिं थारुले प्रेमका कुरा लेख्न असाध्यै कठिन भएको बताइन् । पहिलो प्रेमका कुरा लेख्न ठूलो साहस जुटाउनु पर्यो । पुस्तकभित्रका हरेक कथा युनिक भएको बताउँदै उनले भनिन्, यसमा मैले आफूलाई पुरै नंग्याएकी छु । कार्यक्रमको सञ्चालन गीतकार भुपेन्द्र खडकाले गरेका थिए ।
0 comments
Write Down Your Responses