फर्जी विद्यार्थी भर्नाको विषयमा एकीकृत माओवादी र नेकपा-माओवादीनिकट विद्यार्थी संगठनको विवादले चुनाव स्थगित भएको हुँदा पहिले उनीहरुबीच सहमति हुनुपर्ने अनेरास्ववियु र नेपाल विद्यार्थी संघको भनाइ छ । दुबै अखिल क्रान्तिकारी पनि चुनाव स्थगित हुनुको दोष आफूले लिन तयार छैनन् ।

चुनाव स्थगित हुनुको दोष विद्यार्थी संगठनले एक अर्कालाई लगाएका छन् । बिहीबार चुनाव स्थगितको निर्णय गर्ने बेला मुख्य चारवटै विद्यार्थी संगठनका प्रतिनिधि बैठकमा उपस्थित थिए । बैठकबाट बाहिरिए लगत्तै सबैले चुनाव स्थगितको बिरोध गरे । कति संगठनहरुले क्याम्पसमै प्रदर्शन गरे । ‘तर अब बिरोध गर्नुको पनि औचित्य देखिएन’ अनेरास्ववियुकी नेतृ राधिका खतिवडाले भन्नुभयो-’अब सहमति गरेर छिटो अर्को चुनावको मिति तय गर्नुबाहेक अर्को विकल्प छैन ।’

कांग्रेसले चुनावमा ध्यान दिएन : नेबिसंघ

‘हामी त हदैसम्म लचिलो भएर प्रस्तुत भएका थियौं, तर दुई अखिल क्रान्तिकारीको विवादले चुनाव स्थगित भयो’ नेविसंघका नेता लेखनाथ पोखरेलले भन्नुभयो-’फेरि चाँडै चुनाव गर्न हामी लचक हुन तयार छौं ।’

आफ्नो संगठनले यसपटक धेरै क्याम्पसमा चुनाव जित्ने पक्का भएपछि अरु संगठनले फर्जी भर्ना गरेको उहाँले आरोप लगाउनुभयो । ‘हाम्रो माउ पार्टीले स्ववियु चुनावमा चासो नै दिएन, अरु संगठनका भने पार्टी नै लागेका थिए’ पोखरेलले भन्नुभयो-’जसरी पनि चुनाव जित्नुपर्छ भन्ने मानसिकताले उनीहरुले फर्जी भर्ना गरे, जसको कारण चुनाव हुन सकेन ।’

एकीकृत माओवादीनिकट अखिल क्रान्तिकारीले फर्जी भर्ना गरेको भन्दै बैद्य माओवादी निकट अखिल क्रान्तिकारीले चारवटा क्याम्पसमा तालाबन्दी लगायो । यसपछि विवाद चर्कन थालेको हो । आफ्नो प्रभाव रहेको क्याम्पसमा तालाबन्दी भएपछि एमाओवादी निकट अखिल क्रान्तिकारीले पनि अरु क्याम्पसमा ताला लगायो । ‘चारवटा क्याम्पसमा मात्र विवाद थियो’ रसाइलीले भन्नुभयो-’उहाँहरुले अरु क्याम्पसमा पनि विवाद चर्काएपछि चुनाव हुन सकेन, यसमा हाम्रो होइन उहाँहरुको दोष छ ।’

एमाओवादी समर्थित अखिल क्रान्तिकारीका अध्यक्ष हिमाल शर्मा वैद्यपक्षीय क्रान्तिकारी र एमाले अखिलले स्ववियू चुनाव भाँडेको बताउनुहुन्छ । नेविसंघले चुनावमा बाधा नगरेको शर्माले बताउनुभयो । स्ववियुको चुनाव भएको खण्डमा आगामी संसिवधानसभाको चुनावको वातावरण बन्न भएकाले त्यसलाई भाँड्न वैद्य माओवादीले चुनाव भाँडेको शर्माको आरोप छ ।

‘स्ववियुको चुनाव भएमा वैद्य पक्षको देशैचरि शुन्य सीट आउँछ । एमाले अहिले पनि पहिलो स्थानमा नभएर तेस्रो स्थानमा र्झछ ।’ शर्माले दाबी गर्नुभयो, ‘त्यसैले एमाले र वैद्यपक्ष मिलेर तालाबन्दी गरेकाले चुनाव भाँडियो ।’ आफूहरुले फर्जी विद्यार्थी भर्ना नगरेको र सामुहिकरुपमा भर्ना गरिएको भेटिए खारेज गर्न शर्माले आग्रह गर्नुभयो ।

नयाँ संविधानसभाको चुनाव गर्ने जिम्मा पाएका मन्त्रिपरिषदका अध्यक्ष खिलराज रेग्मी त्रिभुवन विश्वविद्यालयका कूलपतिसमेत हुनुहुन्छ । स्ववियुको चुनाव नै गर्न नसक्ने मान्छेले राष्ट्रिय चुनाव कसरी गर्न सक्छ भनेर प्रश्न गर्नेहरु धेरै छन् । ‘यो रेग्मीको प्रतिष्ठासित जोडिएको विषय हो’ नेविसंघका नेता लेखनाथ पोखरेलले भन्नुभयो-’त्यसैले उहाँले छिटो एउटा घोषणा गरेर चुनावको मिति तय गर्नुपर्छ ।’

तर अहिले स्ववियु चुनाव नहुनुमा विश्वविद्यालयको भन्दा पनि विद्यार्थी संगठनहरु मुख्य जिम्मेवार देखिएका छन् । फर्जी भर्नाको विषयमा सहमति नभएकै कारण चुनाव अन्योलमा परेको हो । ‘जतिसक्दो छिटो विद्यार्थी संगठनहरुबीच सहमति हुन्छ, त्यति छिटो चुनावको वातावरण बन्छ’ विश्वविद्यालयको विद्यार्थी कल्याण तथा खेलकूद शाखा प्रमुख गंगाबहादुर थापाले भन्नुभयो ।

तर, सहमतिका लागि विद्यार्थी संगठनहरु अझै छलफलमा जुटेका छैनन् । ‘शनिबारसम्म सहमति हुन सकेन भने यसवर्ष स्ववियुको चुनाव हुन सक्दैन’ नेविसंघका नेता पोखरेलले भन्नुभयो- ‘यसवर्ष स्ववियुको चुनाव हुने संभावना निकै कम छ, यो दुःखलाग्दो कुरा हो ।’ अनेरास्ववियुकी नेतृ राधिका खतिवडा भने छिटो सहमति भएमा चुनाव हुनेमा ढुक्क हुनुहुन्छ । ‘२९ गतेसम्म सहमति भयो भने पनि चुनाव हुन्छ, नत्र यो वर्ष सम्भावना देखिँदैन’ खतिवडाले भन्नुभयो ।

वैद्यनिकट माओवादीको विद्यार्थी संगठन अखिल क्रान्तिकारीका अध्यक्ष शरद रसाइली पनि यसवर्ष चुनाव हुने सम्भावना देख्नुहुन्न । ‘भदौमा भयो भने हो, नत्र अर्को वर्ष लाग्छ’ रसाइलीले भन्नुभयो ।