२२ साउन, काठमाण्डौं । उनी आफै भ्रष्टाचारको अभियोगमा जेलमा छन् । र, भित्रैबाट वन्यजन्तुका अंग ओसारपसार गरेको आरोपमा जेल परेका बन्दी छुटाउन दबाब दिन्छन् ।

अभियुक्त छुटाउन फोनबाट दबाब दिनेमध्ये एक हुन्, नेपाली कांग्रेसका नेता खुमबहादुर खड्का ।

खड्का मात्र नभई वन्यजन्तुका अंग ओसारपसारसम्बन्धी अभियोग लागेका बन्दी छुटाउन मन्त्रिपरिषद कार्यालय, काँग्रेस नेता बलबहादुर केसी, पूर्व मन्त्रीहरुलगायतबाट समेत दबाब आइरहेको वन कार्यालयका कर्मचारी बताउँछन् । दबाबब बढ्नुमा शक्तिकेन्द्रसँग कुनै न कुनै रुपले सम्पर्क र सम्बन्ध भएका व्यक्ति वन्यजन्तुका अंग ओसारपसारमा संलग्न हुनु नै मुख्य कारण भएको उनीहरुको भनाई छ । ‘दुर्लभ वन्यजन्तुका अंग ओसारपसारको अभियोग लागेका व्यक्ति निर्दोष हुन् भन्दै छाड्न थुप्रै शक्तिकेन्द्रबाट दबाब आउँछ,’ जिल्ला वन स्रोतले भन्यो, ‘यस्तो दबाब जेलभित्रैका बन्दी, त्यसमाथि कांग्रेस नेता खुमबहादुर खड्काबाट आउँदा हामी चकित परेका छौं,’- नागरिक दैनिकमा खबर छ ।

काठमाण्डौं जिल्ला वन कार्यालय स्रोतका अनुसार खड्काले दुर्लभ वन्यजन्तु ध्वाँसे चितुवाका छालासहित पक्राउ परेका दुईजनालाई छुटाउन जेलबाटै दबाब दिएका हुन् ।