‘तालिमको दौरानमा शारीरिक व्यायामको क्रममा रोगीसमेत भर्ना हुन पुगेको खुल्न आएको थियो । सो कुरा सशस्त्र प्रहरी महानिरीक्षक कोषराज वन्तको जानकारीमा आएपछि सशस्त्र प्रहरी बलले छानविन समिति गठन गरेर जाँच गर्दा कमजोरी खुल्न आएको हो ।’ सशस्त्रको विज्ञप्तिमा भनिएको छ,-’परीक्षामा प्रत्यक्ष खटिएका ७ जना सशस्त्र प्रहरी उपरीक्षकसहित ६६ जनालाई सशस्त्र प्रहरी बलले हालै विभागीय कारवाही समेत गरेको छ ।’

त्यसैगरी स्वास्थ्य परिक्षणमा खटिएका चिकित्सक र प्राविधिकहरु समेतलाई कारवाही भएको र मापदण्ड विपरीत भर्ना भएका १३ जनालाई सशस्त्र प्रहरी नियमावली बमोजिम बर्खास्त समेत गरिएको प्रहरीले जनाएको छ ।

विगतको छनौट कार्यलाई सुधार गर्दै यसपल्ट परीक्षा प्रणालीमै प्रसस्त सुधार गरिएको सशस्त्र प्रहरीको दाबी छ । लिखित र अन्तर्वार्ता बाहेकका परीक्षामा अनुतिर्ण हुने परिक्षार्थीलाई त्यसै ठाउँमा प्रवेश पत्रमै केमा अनुत्तीर्ण भएको हो, कारण खुलाई प्रवेश पत्र फिर्ता गर्ने व्यवस्था मिलाइएको जनाइएको छ । परिक्षार्थीले अनुत्तीर्ण हुनाको कारणप्रति चित्त नबुझेमा त्यसै ठाउँमा सम्बन्धित अधिकृत समक्ष कुरा राख्न सक्ने र त्यसमा पनि चित्त नबुझेमा सम्बन्धित ठाउँको भर्ना छनौट शाखामा निवेदन दिन सक्ने व्यवस्था समेत मिलाइएको सशस्त्र प्रहरीले जानकारी गराएको छ ।

गत वर्षको परीक्षा सञ्चालनमा खटिएका सशस्त्र प्रहरी कर्मचारीलाई विभागीय कारवाही गरिएबाट यस वर्ष त्यस्तो गल्ती नदोहोरिने र परीक्षा उदाहरणीय हुने सशस्त्र प्रहरी बलको दाबी छ । यस वर्ष जवान तहमा लिखितमा भन्दा पनि शारीरिक रुपमा राम्रो हुनु पर्नेतर्फ समेत ध्यान पुर्‍याइएको बताइएको छ ।

यसपल्टको भर्ना छनौट कार्य काठमाडौंको बलम्बु तथा पाँचै क्षेत्रस्थित सशस्त्र प्रहरी मुख्यालय बाहिनीहरु तथा युक्ति तालिम महाविद्यालय बर्दघाट र तालिम केन्द्र नौवस्ता बाँकेमा संचालन हुने कार्यक्रम रहेको छ । छनोट कार्यमा सशस्त्र प्रहरी उपरीक्षक देखि जवानसम्म प्रत्यक्ष रुपमा संलग्न रहने छन् भने सम्बन्धित बाहिनीका बाहिनीपति सशस्त्र प्रहरी नायव महानिरीक्षकले अनुगमन गर्ने छन् ।

सशस्त्र प्रहरी बलमा रिक्त जवान तथा परिचर पदमा हालै दरखास्त आव्हान गरिएको र भदौ महिनाबाट परीक्षा सञ्चालन प्रहरीले जनाएको छ । परीक्षामा सहभागी हुने सशस्त्र प्रहरी कर्मचारीहरुका लागि सशस्त्र प्रहरी बल प्रधान कार्यालयमा अनुशिक्षण तालिम सञ्चालन भइरहेको छ । सो तालिममा ८ जना सशस्त्र प्रहरी उपरीक्षकसहित ३९ जना सहभागी छन् ।

परीक्षा सञ्चालनको बेला उत्तिर्ण गराइदिने भन्दै कोही कसैले सम्पर्क गर्न आएमा त्यसमा विश्वास नगरी कुनै भ्रममा नपर्न प्रहरी बलले आग्रह गरेको छ । परीक्षाको बेला कसैले उत्तिर्ण गराइदिने भन्दै ठगी गर्न खोजेमा सशस्त्र प्रहरीलाई खबर गर्न तथा बलको हटलाईन सेवा १११४ मा जानकारी गराउन समेत सशस्त्र प्रहरी बलले आग्रह गरेको छ ।

यसवर्ष नयाँ भर्नाका लागि परीक्षा प्रणाली र पाठ्यक्रममा सुधार गरिएको छ । भर्नामा कसैको भनसुन तथा सिफारीसलाई महत्व नदिईकन स्वच्छ र निष्पक्ष ढंगले काम गर्न वन्तले निर्देशन दिनुभएको छ । सशस्त्र प्रहरीका अनुसार भर्ना छनौटमा लोकसेवा आयोगका अध्यक्ष वा निजले तोकेको लोकसेवा आयोगका सदस्य सशस्त्र प्रहरी सेवा अयोगका अध्यक्ष रहन्छन् ।

त्यसैगरी गृहसचिव, नेपाल सरकारले तोकेको अर्का एक जना विशिष्ट श्रेणीका अधिकृत, नेपाली सेनाका विशिष्ट श्रेणीका अधिकृत सदस्य रहने सेवा आयोगमा सशस्त्र प्रहरी महानिरीक्षक सदस्य सचिव रहने व्यवस्था सशस्त्र प्रहरी ऐनमा रहेको छ । त्यसैगरी जवान तहको भर्ना कार्य सशस्त्र प्रहरी क्षेत्रीय सेवा आयोग मार्फत हुने गर्दछ । जसमा सम्बन्धित सशस्त्र प्रहरी बल कार्यालयको प्रमुख संयोजक हुन्छन् भने लोकसेवा आयोग क्षेत्रीय निर्देशनालयका अधिकृत प्रतिनिधि तथा प्रमुख जिल्ला अधिकारी/क्षेत्रीय प्रशासन कार्यालयका अधिकृत प्रतिनिधि र नेपाली सेनाका अधिकृत प्रतिनिधि सदस्य रहने व्यवस्था रहेको छ ।

सशस्त्र प्रहरी महानिरीक्षक कोषराज वन्तले यसपल्ट पाँचै विकास क्षेत्रमा भर्ना छनोट कार्यमा संलग्न हुने सशस्त्र प्रहरी अधिकृत तथा जवानहरुलाई सशस्त्र प्रहरी बल प्रधान कार्यालयमा झिकाई कसैको दबाव र कुनै पनि प्रकारको प्रभावमा नपरेर निष्पक्ष ढंगले नयाँ भर्ना कार्यमा संलग्न रहन निर्देशन दिनुभएको सशस्त्र प्रहरीद्वारा शनिबार सशस्त्र प्रहरी नायब निरीक्षक अजय छत्कुलीद्वारा जारी विज्ञप्तिमा जनाइएको छ ।