३ भदौं, काठमाण्डौं । स्पेनिस ला लिगा फुटबलमा डिफेण्डिङ च्याम्पियन बार्सिलोनासँगै रियल मड्रिडले विजयी सुरुवात गरेका छन् । गएराति भएको आफ्नो पहिलो खेलमा बार्सिलोनाले लेभान्टेलाई ७-० को फराकिलो अन्तरले पराजित गरेको छ ।

घरेलु मैदान नाउक्याम्पमा भएको खेलमा बार्सिलोनाले दोस्रो मिनेटमा नै एलेक्स सान्चेजको गोलबाट अग्रता लिएको थियो । ११ औं मिनेटमा लिओनल मेस्सीले अग्रता दोब्बर पारे भने २३ औं मिनेटमा ड्यानली अल्भेसले गोल गरे । गोलको वर्षा नै गरेको बार्सिलोनाका लागि २५ औं मिनेटमा पेड्रोले गोल गरेपछि ४-० को अग्रता लियो । ४१ औं मिनेटमा मेस्सीले पेनाल्टीमार्फत गोल गरे भने ४४ औं मिनेटमा जाभीले गोल गरेपछि पहिलो हापमा बार्सिलोना ६-० को अग्रता लिन सफल भयो । दोस्रो हातको ७२ औं मिनेटमा पेड्रोले व्यक्तिगत दोस्रो गोल गरेपछि बार्सिलोना लेभान्टेमाथि ७-० को जित निकाल्न सफल भयो ।

अर्को खेलमा रियल मडि्रडले बाटिसलाई २-१ गोल अन्तरले पराजित गरेको छ । खेलमा अग्रता भने बाटिसले लिएको थियो । १२ औं मिनेटमा मोलिनाले गोल गर्दै बाटिसलाई सुरुवाती अग्रता दिलाए । २५ औं मिनेटमा करिम बेन्जिमाले बराबरी गोल गरे भने ८६ औं मिनेटमा इस्कोले डेब्यू खेलमा गोल गरेपछि रियल मड्रिड २-१ गोलले विजयी भएको छ ।