२ भदौ, काठमाण्डौं । लोकप्रिय खेल क्रिकेटका अन्तर्राष्ट्रिय प्रतियोगिता हारजितको अड्कल गर्दै थापिने बाजीमा अबौं रुपैयाँको कारोबार हुने गरेको छ । खेल नतिजा पूर्वानुमान गरेर नगदमा बाजी थाप्ने यो धन्धा एक प्रकारको जुवा हो ।

नेपालका विभिन्न सहरमा सट्टाबाजीका पेसेवर गिरोहको संलग्नता बढ्दै गएको छ । हालै सम्पन्न इन्डियन प्रिमियर लिग (आइपीएल) मा नेपालबाट ४६ करोड रुपैयाँ हुन्डी मार्फत बाहिरिएको तथ्य फेला परेको हो । काठमाण्डौं, विराटनगर, वीरगञ्ज, नेपालगञ्ज, पोखरामा सक्रिय १५ जनाभन्दा बढी बुकी (जुवा खेलाउने व्यक्ति) मार्फत पाँच वर्षयता २३ अर्व रुपैयाँ कारोबार भएको स्रोतले बताउको अन्नपूर्ण पोस्ट दैनिकमा खबर छ ।

राजधानीलगायतका मुख्य सहरमा सट्टाबाजीमा ठूलो कारोबार हुने गरे पनि दलालमार्फत मोटो रकम हातपारेका कारण प्रहरी प्रशासन चुप लाग्ने गरेको स्रोतको दाबी छ ।

प्रहरीका मुख्य अनुसन्धान एकाई विशेष व्युरो, अपराध अनुसन्धान विभाग र केन्द्रीय अनुसन्धान व्युरोका अधिकारीले यसबारे सामान्य जानकारी मात्रै भएको बताएका छन् । नेपाल प्रहरीका प्रवक्ता नायब महानिरीक्षक नवराज सिलवालले यसबारे छानविन गरी कारबाही गर्नसक्ने व्यवस्था रहेको बताए ।