कोमलले नचाइन् दोलखाबासीलाई

चरिकोट, (नेस)। बाँझो खेतमा छड्के सलाम छ मायालाई पहिलो भेटमा।
हालैबाट नायिका बनेकी गायिका कोमल ओलीले सुमधुर स्वरका साथ यो गीत गाउँदा दोलखाको सदरमुकाम चरिकोटस्थित कालिञ्चोक उच्च माविको प्राङ्गणमा भेला भएका सयौं दर्शकले कम्मर मर्काई मर्काई नाचे।
नेपाल पत्रकार महासंघ दोलखा शाखाको भवन निर्माणको सहयोगार्थ आयोजित हास्य व्यंग्य यात्रा ०६९ मा कोमलसँगै लोकप्रिय हास्य अभिनेता जितु नेपालको प्रहसन पनि निकै सशक्त र व्यंग्यात्मक थियो। जितुले कोमल ओलीको गीत र भनाइमा समेत उनकै अगाडि तीखो व्यंग्य गरेका थिए। कार्यक्रममा पूर्ण थापा र रवि डंगोलको प्रस्तुति तथा राधिका अधिकारीको नृत्यले दर्शकलाई तताएको थियो। स्थानीय निम्फा ब्यान्डको नृत्य पनि निकै घतलाग्दो थियो।
कार्यक्रममा दोलखामै जन्मिएका अभिनेता मदनदास श्रेष्ठले आफ्नो रेडियो नाटकको एउटा झलक प्रस्तुत गरेका थिए भने लोकगायक कुमारध्वज कार्कीले एउटा गीत प्रस्तुत गरेका थिए।

Labels: मनोरञ्जन