१६ वैशाख, काठमाडौं । पेरिस सेन्ट जर्मेन फ्रान्सको लिग वानको उपाधि नजिक पुगेको छ । सोमबार इभिएन टीजीविरुद्धको खेलमा १-० को जित निकाल्ने क्रममा इङ्गल्याण्डका पूर्व कप्तान समेत रहेका डेभिड वेकहृयाम रातो कार्ड खान पुगे ।

खेलको ८४ औं मिनेटमा मैदान प्रवेश गरेका बेकहृयामले अतिरिक्त समयमा रातो कार्ड पाएका हुन् । यसअघि नै ८१ औं मिनेटमा मार्को भर्राटीले रातो कार्ड पाएका कारण पेरिस सेन्ट जर्मेन १० खेलाडीमा सिमित भएको थियो ।

खेल सकिएलगतै मैदानमा पेरिस सेन्ट जर्मेन र इभीएनका खेलाडीहरु आपसमा भिडेका थिए । खेलाडीहरुलाई छुट्याउन हम्मेहम्मे भएको थियो । त्यसक्रममा रेफ्रीले पेरिस सेन्ट जर्मेनका रक्षक साइरोग्यु र इभीएनका किलिफालाई पनि रातो कार्ड दिए ।

जितपछि पेरिस सेन्ट जर्मेनको ३४ खेलबाट ७३ अंक भएको छ र लिग च्याम्पियन बन्न अब ४ खेलबाट ४ अंक मात्र चाहिएको छ । ३४ अंक जोडेको इभीएन भने रेलिगेशनबाट बच्न संघर्षरत छ ।