१० जेठ, टोक्यो । एक जापानी महिलाको हत्याको अभियोगमा १५ वर्ष जेल जिवन विताएका नेपाली नागरिक गोविन्दप्रसाद मैनालीले क्षतिपूर्ती पाउने भएका छन् । मैनालीलार्इ जापान सरकारले क्षतिपूर्ती वापत ६ करोड ८० लाख जापानी येन उपलब्ध गराउने भएको जापानवाट सञ्चालित न्यूज पोर्टल टोक्यो नेपाल डटकमले जनाएको छ । जापानको कानूनमा निर्दोष सावित भए क्षतिपूर्ति दैनिक एक हजारदेखि १२ हजार येनसम्म हुनसक्ने व्यवस्था छ । हत्या आरोपमा जेल चलान भएका मैनाली निर्दोष ठहर भएपछि टोकियो अदालतले जापान सरकारलाई यस्तो आदेश दिएको हो । गत जुन १५ तारिखमा निर्दोष सावित भइ जुन १७ तारिखमा मैनाली १७ वर्षपछि नेपाल फर्किएका थिए ।  एक जापानी महिलाको हत्या गरेको अभियोगमा उनलाई सन् १९९७ मा पक्राउ गरी जेल चलान गरिएको  थियो ।

४२ वटा नमुनाको डीएनए परिक्षण गर्दा कुनैपनि मैनालीसँग नमिलेपछि टोक्यो उच्च अदालतको आदेशमा  मैनाली जेलमुक्त भएपछि गत जुन १५ मा नेपाल फर्किएका थिए । आफू निर्दोष रहेको दावी सहित मुद्दा पनरावलोकन गर्न मैनालीले टोक्यो अदालतमा निवेदन दिएपछि त्यसउपर सुनुवाइ गर्दै टोक्यो उच्च अदालतले गत जुन ७ मा जेलमुक्त गरी मुद्दा पुनरावलोकनका लागि आदेश दिएको थियो ।

टोक्यो इलेक्ट्रीक पावर कम्पनीकी ३९ वर्षीया एक महिला कर्मचारीलाई बलात्कार गरी हत्या गरेको अभियोगमा जेल चलान गरिएको थियो । सन् २००३ मा उच्च न्यायलयमा उनी विरुद्ध मुद्दा दायर गरिएको थियो भने टोक्योको उच्च न्यायलयले २००५ मा उनलाई दोषी ठहर गर्दै आजीवन काराबासको फैसला सुनाएको थियो ।