FirstKhabar: रक्सी खाएर मातेको विवादमा सांसदद्वारा राजिनामा

रक्सी खाएर मातेको विवादमा सांसदद्वारा राजिनामा

न्यु जिल्यान्डमा एक सत्ताधारी राजनीतिज्ञले मदिराको मातमा ‘वेटर’लाई दुव्र्यवहार गरेकोको आरोपमा विवाद चर्किएपछि राजिनामा दिएका छन् भने प्रधानमन्त्री जोन कीले सोमबार यसको स्वागत गर्नुभएको छ । नेसनल पार्टीका सांसद एरोन गिलमोरले आइतबार राती सांसद पदबाट राजिनामा दिने घोषणा गरेका छन् । गत महिना उनले साउथ आइल्यान्डको एक रेस्टुराँमा खाना खाँदा आफूलाई धान्नै नसक्ने गरी मदिरापान गरेका थिए । ”मैले गल्ती गरेँ । म पनि मानिस नै हुँ”, गिलमोरले पत्रकारहरूलाई बताए । उनले आफ्नो सत्यनिष्ठामाथि आक्रमण भएको, त्यसले आफ्ना वरपरका व्यक्तिहरूमाथि चोट पुग्न थालेको र यो उनीहरूप्रति उचित कार्य नभएको बतए । गिलमोरसँगै खाना खान बसेका वकिल एन्ड्र्यु रिचेजले सांसदले उनलाई थप मदिरा दिन नमान्ने वेटरसँग विवाद गरेको र अपशब्द बोलेको बताए । विवादका क्रममा गिलमोरले प्रधानमन्त्रीको कार्यालयलाई भनेर यी वेटरको जागिर खोसिदिने धम्की दिएको र यी वकिलले पछि यसका लागि रेस्टुराँसँग माफी माग्नुपरेको बताइएको छ । गिलमोरले रिचेजका आरोपलाई अस्वीकार गरेपनि आफू मदिराका कारण मातेको तथा ‘वेटर’ प्रति उग्र तथा रुखो भएको स्वीकार गरेका छन् । गिलमोरले सुरूमा राजिनामा दिन अस्वीकार गरे पनि उनले आफूलाई प्रधानमन्त्रीको समर्थन नरहेको देखेपछि राजिनामा दिएका हुन् । प्रधानमन्त्री कीले टीभीएनजेलाई यी सांसदको व्यवहार उचित नभएको दलको धारणा रहेको बताउनुभयो । उहाँले गिलमोरले राजिनामा दिएर आफू र आफ्नो परिवारका लागि सही काम गरेको बताउनुभयो । गिलमोरलाई नेसनल पार्टीका अर्का एक सदस्यबाट प्रतिस्थापन गरिने र यसबाट गठबन्धन सरकारमा कुनै प्रभाव नपर्ने बताइएको छ । रासस/एएफपी

0 comments

Write Down Your Responses