९ साउन, काठमाडौं । नेपाल साफ यू-१६ च्याम्पियनसिप फुटबलको सेमिफाइनलमा प्रवेश गरेको छ । बुधबार भएको समूह चरणको अन्तिम खेलमा पाकिस्तानलाई ३-० ले पराजित गर्दै नेपाल ७ अंकका साथ समूह एको विजेताका रुपमा अन्तिम चारमा प्रवेश गरेको हो । अर्को खेलमा भुटानलाई ३-१ ले पराजित गरेको अफगानिस्तान ५ अंकका साथ समूह उपविजेता बनेको छ ।

भारत र बंलादेश यसअघि नै समूह बीबाट सेमिफाइनल पुगिसकेका छन् । समूह विजेताको टुङ्गो भने भोलि हुने समूह चरणको अन्तिम खेलले लगाउनेछ ।

त्रिपुरेश्वरसिथत दशरथ रंगशालामा भएको खेलमा नेपालले १३ औं मिनेटमा सुजन लिम्बुको गोलबाट अग्रता लिएको थियो । ६५ औं मिनेटमा विमल घर्तिमगरले नेपालको अग्रता दोब्बर पारे । खेलको ७३ औं मिनेटमा विमलले नै दोस्रो गोल गरेपछि नेपाल ३-० को जित निकाल्न सफल भयो ।