मुम्बई – अदालतले बुधबार लगाएको आरोप प्रमाणित भए सलमान खानले १० वर्ष कैद सजाय पाउनेछन्। मुम्बई सेसन कोर्टले बुधबार उनीविरुद्ध 'बिना नियत गरिएको हत्या'को मुद्दा दर्ता गरको छ।

मुद्दामा दोषी पाइए सलमानले १० वर्षको जेल सजाय काट्नु पर्नेछ। यसअघि उनलाई लापरवाहीको आरोप लगाइएको थियो। सलमान बुधबार अदालतमा उपस्थित भएका थिए। उनको सुनुवाई अगस्ट १९ देखि सुरु हुने भएको छ।

२००२ को सेप्टेम्बरमा सलमानले बान्द्राको फुटपाथमा सुतिरहेका मजदुरमाथि आफ्नो गाडी दौडाएका थिए। सो क्रममा एक मजदुरको मृत्यु भएको थियो भने तीन जना सख्त घाइते भएका थिए। ११ वर्षसम्म लापरवाहीको आरोपमा बान्द्रा कोर्टमा बहस पैरवी चलिरहे पनि सबुत प्रमाणहरुले सलमानको घटना गम्भीर रहेको देखाएपछि अदालतले बुधवार नयाँ आरोप तय गरेको हो। उनको रक्त परीक्षणमा अल्कोहलको मात्रा देखिएको थियो भने गाडीले कुल्चिएपछि घाइतेलाई सहायता गर्नुको सट्ट गाडी भागेका थिए। 

सलमान यसअघि सन् १९९८ मा हरिण मारेको अभियोगमा हप्ता दिनभन्दा बढी हिरासतमा बसिसकेका छन्।