काठमाडौ, श्रावण १५ - सेलिब्रेटीलाई नाम, दाम र कामले बाँकी सर्वसाधारण भन्दा फरक बनाउँछ । सेलिब्रेटीको निजी जीवनसमेत अन्यको लागि चासोको विषय बनिदिँदा कहिलेकाहीं त्यही घाँडो भइदिन्छ । प्राइभेसी मेन्टेन गर्न नसक्दा कहिलेकाहीं कलाकार, स्टार र सेलिबि्रटी तनावमा पर्ने गर्छन् ।

केहीअघि कट्रिना कैफले प्रेमी रणवीर कपुरसँग विकिनी पोजमा स्पेनको सामुदि्रक तटमा मस्ती मारिन् । तर त्यसबेलाका फोटाहरु गत साता मात्रै मिडियामा छाए । फिल्ममा समेत कपडा फुकाल्न नखोज्ने कट्रिनाका पहिलो पटक बिकिनी तस्बिर त्यो पनि सर्टलेस बनेका रणवीरसँग रमाइरहेको अवस्थाका पाइएपछि कम्तीमा जोडीको भविष्यमा संकट आउने अड्कल काटिएको थियो । तर अचम्म, कट्रिना त फोटो लिक भएकामा झन् खुसी पो छिन् रे । यतिबेला उनलाई कुचोले बढार्नु पर्ने कसिंगर हुरीले लगिदिएझैं भएको रहेछ । सबैभन्दा खुसी त उनी रणवीरसँगको सम्बन्ध फ्ल्यास भएकामा छिन् । दुईको सम्बन्ध गुपचुपमै चलिरहँदा रणवीरसँग दीपिका पादुकोण पनि बारम्बार जोडिन आउँदा कटि्रना दुःखी हुने गरेकी थिइन् । कम्तीमा अब कटि्रनाले रणवीरका लागि अरूसँग प्रतिस्पर्धा गर्नु नपर्ने भएको हो । अर्को फाइदाचाहिं जोडीलाई नै भएको छ । कुनै बेलाका कटि्रनाका प्रेमी सलमान खान दुवैको टाउको दुखाइ बन्दै आएका थिए ।

पूर्वप्रेमिका ऐश्वर्या रायकै लागि विभिन्न बलिउड हिरोसँग झैझगडामा उत्रिएर ब्याड ब्वायको छवि देखाइसकेका खानले कट्रिनाका लागि पनि उपद्रो नगर्लान् भन्ने थिएन । त्यसैले पनि दुईले सम्बन्धलाई सार्वजनिक गर्न हच्किरहेको बताइएको छ । यस्तोमा अचानक फोटो लिक भएपछि भने टन्टै साफ भएको छ । केही समय सलमानको प्रतिक्रियाको 'पर्ख र हेर' मा रहेका कट्रिना-रणवीरलाई साता दिनसम्म पनि उनी चुप देखिएपछि ढुक्क भएको हुन सक्छ ।

त्यही भएर पनि यतिबेला कटि्रना अरूभन्दा बढी खुसी छन् । उता, सलमान पनि भावी पत्नीका रूपमा हेरिएकी रोमानियाली नायिका लुलिया भन्तुरसँग जंगल सफारी गरिरहँदाका गोप्य तस्बिर लिक भएपछि आफ्नै बारेमा बोल्न सकिरहेका छैनन् ।

दुई साताअघि मात्रै कटि्रनाको बर्थ डेलाई स्पेसल बनाउन सँगै फिल्म हेरेर डिनरमा पुगेका रणवीरलाई पापाराजीले कारमा सँगै भेटाएका थिए । दीपिकासँग पनि समानान्तर सम्बन्ध देखाएर कन्फ्युजन पारिरहेका रणवीर अन्ततः कटि्रनासँग सिरियस रहेको हालै आइसल्यान्डको एक कन्सर्टमा एकअर्काको बाहुपासमा कस्सिएको फोटोलाई फ्यानले ट्वीट गरेपछि खुलेको थियो । त्यसपछि त झन् समुद्र किनारमा दुईको तात्तातो अफेयर्सको फोटो लिक भएको हो । फोटोहरू स्टारडस्ट म्यागाजिनले छापेको थियो ।

स्पेनपछि जोडी श्रीलंका पुगेको थियो । त्यहाँ रणवीर 'ग्यांग्स अफ वासेपुर' निर्देशक अनुराग कश्यपको 'बम्बे भेल्भेट' को लागि पुगेका थिए भने कटि्रना पनि हृत्तिक रोशनको ब्रेन सर्जरीका कारण 'ब्याङ ब्याङ' को सुटिङ रोकिएपछि छुट्टी मनाउन रणवीरकहाँ पुगेकी थिइन् ।