४ भदौ, काठमाडौं । सिंगापुरमा जारी इमर्जिङ टिम्स कप क्रिकेटमा नेपाल भारतको २३ वर्षमुनीको टोलीसँग ८४ रनले पराजित भएको छ । हारसँगै नेपालको अघिल्लो चरण प्रवेश कठिन भएको छ ।

भारतले प्रस्तुत गरेको २ सय ६९ रनको लक्ष्य पछ्याएको नेपालले ५० ओभरमा ८ विकेटको क्षतिमा १ सय ८४ रन मात्र बनाउन सक्यो ।

यसअघि टस हारेर पहिले व्याटिङ थालेको भारतले निर्धारित ५० ओभरमा ५ विकेटको क्षतिमा २ सय ६८ रन बनायो । इण्डियन पि्रमियर लिग आईपीएल खेलेका खेलाडीहरुको बाहुल्य रहेको भारतीय टोलीका सामू नेपाली बलरहरु निरिह देखिएका थिए ।

भारतका लागि लोकेश राहुलले सर्वाधिक ८८ रन बनाए । उनले उन्मुक्त चन्दसँग पहिलो विकेटका लागि १ सय १८ रनको ओपनिङ साझेदारी गरेका थिए । चन्द पहिलो विकेटका रुपमा व्यक्तिगत ६१ रनमा आउट भए । सूर्यकुमार यादवले ६५ रन बनाए भने अंकित वार्नेले २५ रन जोडे ।

नेपालका लागि बसन्त रेग्मीले १० ओभरमा ९० रन दिएर ३ विकेट लिए भने अभिनाश कर्ण र शक्ति गौचनले समान १-१ विकेट लिए ।