हलिउड नायिका एन्जेलिना जोलीले अभिनय गरेको फिल्म रिलिज नभएकै तीन वर्ष भइसक्यो । 'द टुरिस्ट' खेलेपछि बरु उनी 'इन द ल्यान्ड अफ ब्लड एन्ड हनी' को निर्देशनमा लागिन्, फिल्ममा देखिएकी छैनन् । ६ सन्तानकी आमा जोली पछिल्ला वर्ष गृहस्थीमा पनि बढी व्यस्त रहिन् ।

तैपनि गएको एक वर्षमा उनले ३३ मिलियन डलर कमाइ गरेकी छन् । जुन रकम हलिउड नायिकामै सर्वाधिक हो । धनीहरूको सूची सार्वजनिक गर्ने फोब्र्स पत्रिकाले हालै गरेको तथ्यांकमा जोली गतवर्ष सर्वाधिक कमाइ गर्ने नायिकाको पहिलो नम्बरमा रहेकी हुन् । उनले अघिल्लो वर्षभन्दा यसपालि १३ मिलियन डलर धेरै कमाइ गरेकी फोब्र्सले जनाएको छ । क्यान्सरका कारण आफ्ना दुवै स्तन गुमाउन पुगे पनि जोलीले सन् २०१४ मा 'मेलफिसेन्ट' फिल्मबाट पुनः अभिनयमा र्फकन लागेकी छन् । उक्त फिल्मका लागि जोलीलाई १५ मिलियन डलर दिइएको छ ।

फोब्र्सको धनी नायिकाको सूचीमा 'द हंगर गेम्स' की ओस्कार अवार्ड विजयी नायिका जेनिफर लरेन्स दोस्रो स्थानमा आएकी छन् । २२ वर्षीया जेनिफरको गतवर्षको कमाइ जोलीको भन्दा ६ मिलियन डलर मात्रै कम हो । अघिल्लो सूचीमा एक नम्बरकी धनी हलिउड नायिका बनेकी ट्वालाइट सिरिजका फिल्मकी नायिका क्रिस्टिन स्टुवार्ट यसपटक भने २२ मिलियन डलर कमाइसहित तेस्रोमा परेकी छन् । स्टुवार्टका लागि यस वर्ष ट्वालाइटको सिरिजले अन्त्यसँगै को-स्टार प्रेमी रोबर्ट प्याटिन्सनसँगको रिलेसनसिपको पनि अन्त्यले तनावमै बित्यो ।

त्यसैगरी 'वी आर द मिलर्स' नायिका जेनिफर एनिस्टन २० मिलियन डलरसहित चौथो र 'द अमेजिंग स्पाइडर म्यान' नायिका एम्मा वाट्सनले गतवर्ष १६ मिलियन डलर धन आर्जन गरेर पाचौं धनी हलिउड नायिकामा परिन् । सन् २००९ मा ३० मिलियन डलरमा बनेको फिल्म 'द ब्लाइन्ड साइड' बाट ओस्कार अवार्ड जित्नुका साथै तीन सय नौ मिलियन डलर कमाइ गरेपछि यसकी नायिका सान्ड्रा बुलोक अघिल्लो पटक तेस्रो धनी नायिकामा परेकी थिइन् । यसपटक भने १४ मिलियन डलर मात्रै कमाइसहित सातौं नम्बरमा धकेलिएकी हुन् ।