२८, साउन, मोरङ । ट्रयाक्टरले मोटरसाइकललाई बाटो नछाडेको भन्दै एकजना मोटरसाइकल चालकले ट्रयाक्टर चालकलाई हिर्काउँदा मोरङको बिराटचौकमा सोमबार ट्रयाक्टर चालकको मृत्यु भएको छ ।

आफ्नो मोटरसाइकलाई ट्रयाक्टरले साइड नदिएको भन्दै मोटरसाइकल चालक बगु भनिने मोरङ इन्द्रपुर-७ का ४८ वर्षीय बधुकुमार थारुले मोरङ कटहरी ७ बस्ने ५५ वर्षीय ट्रयाक्टरका चालक बसीरशेख मियालाई हिर्काउँदा उनको मृत्यु भएको प्रहरीले बताएको छ ।

को १ त ५४३३ नम्बरको ट्रयाक्टरमा ईंटा लिएर बिराटचौकदेखि दक्षिणतिर गइरहेका मियालाई पछाडिबाट को ६ प ९१३९ नम्बरको मोटरसाईकलमा आइरहेका थारुले कुटेको इलाका प्रहरी कार्यालय बेलबारीका प्रहरी निरीक्षक नवराज कार्कीले बताउनुभयो ।

थारुले बिराटचौकदेखि करिब एक किलोमीटर दक्षिण सिसौघारीमा मोटरसाइकल तेस्र्याई बाटो छेकेर मियाँलाई कुटेका थिए । चालक मियाँलाई ट्रयाक्टरको चालक बस्ने सिटमा नै मुडकीले प्रहर गरेको प्रत्यक्षदर्शीलाई उधृत गर्दै प्रहरी निरीक्षक कार्कीले बताउनुभयो । चालक मियाँलाई उपचारका लागि विराटचौकस्थित अस्पतालमा ल्याउँदा ल्याउँदै उनको मृत्यु भएको प्रहरीले बताएको छ । थारुलाई प्रहरीले नियन्त्रणमा लिएको छ ।

-अर्जुन राजवंशीको सहयोगमा