रौतहटमा आफैले अध्यापन गराउने छात्रालाई यौन दुरव्यवहार गरेको अभियोगमा प्रहरीले शिक्षक कामेश्वर साहलाई पक्राउ गरेको छ ।
गौर–८ स्थित निजी विद्यालय ‘इन्टरनेशनल बाल एकेडेमी’का शिक्षक साह यौन दुरव्यवहारको आरोपमा पक्राउ परेका हुन् । छात्राका अभिभावकहरुले साहलाई  (बिहीबार) पक्राउ गरी प्रहरी समक्ष बुझाएको उपरीक्षक गोविन्दराम परियारले जानकारी दिए ।
कक्षा–५ मा अध्ययनरत ३/४ जना छात्राले आफूहरुलाई पटक–पटक शिक्षक साहले यौन दुरव्यवहार गरेको गुनासो गरे पछि अभिभावकहरु मिलेर उनलाई प्रहरीमा बुझाएका हुन् ।
११/१२ बर्षीया बालिकाहरुका सम्बेदनशील अंग अठ्याउने, शरीर चलाईदिने तथा चुम्बनसम्मका कार्य गर्ने गरेको पीडित बालिकाहरुले आरोप लगाएका छन् ।
‘शिक्षक कामेश्वर साहले हाम्रा संबेदनशील अंग अठ्याई दिने गर्थे,’ पीडित एक बालिकाले भनिन्, ‘तीन/चार जना साथीलाई साहले लगातार चुम्बन गर्ने, अठ्याउने गरे ।’
शिक्षक साहको चर्तिकलाका विषयमा बालिकाहरुले आ–आफ्ना अभिभावकलाई बुधबार जानकारी गराएका थिए ।
यौन दुरव्यवहारको आरोप सुनेर आक्रोशित बनेका अभिभावकहरुले शिक्षक साहलाई नियन्त्रणमा लिई मरणसन्न हुने गरी कुटपिट समेत गरेका छन् ।
‘छात्रा माथि भएको यौन दुरव्यवहारको घटनाले दु:खी भएको छु,’ प्रधानाध्यापक सन्तोष पौडेलले भने, ‘शिक्षक सहलाई कारबाही गर्न सहयोग गर्छु ।’
प्रहरी उपरीक्षक परियारले सम्मानित शिक्षण पेशामा रहेर घृणित कार्य गर्ने शिक्षकलाई हदै सम्मको कारबाही हुने बताए । उनले भने, ‘आफ्नै छात्रा माथि भएको घटना अकल्पनीय छ ।’
राजधानीसहित मुलुकका विभिन्न स्थानका निजी विद्यालयमा यौन दुरव्यवहारका घटनामा बृद्धि भईरहेका बेला रौतहटमा पनि निजी विद्यालयमै सो घटना दोहरिएको छ ।