४ भदौ, काठमाण्डौं । उपत्यकाका तीनवटै जिल्ला बर्डफ्लुको उच्च जोखिम रहेका बेला सरकारले भक्तपुर र काठमाण्डौंलाई संकटग्रस्त क्षेत्र घोषणा गरी कुखुरा तथा पक्षीजन्य वस्तु बिक्रीवितरणमा रोक लगाएको छ । तर रोगको उपचार गर्न पुगिने अस्पतालका क्यान्टिनमा भने निस्पिmक्री रुपमा कुखुराका अन्डा बिक्री भइरहेको छ ।

सरकारले हालसम्म कुखुरामा मात्र देखिएको बर्डफ्लु मानिसमा सर्ने सम्भावना बढी भएको भन्दै बिक्रीवितरणमा रोक लगाएको भए पनि उपत्यकाका अधिकांश अस्पतालका क्यान्टिन तथा अस्पताल आसपासका होटल तथा रेस्टुरेन्टमा खुलेआम अन्डाका परिकार बिक्री भइरहेको पाइएको नागरिक दैनिकमा खबर छ ।

अन्य अस्पतालको तुलनामा बिरामीको बढी चाप हुने देशकै पुरानो वीर अस्पतालको क्यान्टिनमा त अन्डा मात्र होइन, कुखुराको मासुका परिकारसमेत फेला परेको छ । उपत्यकाका विभिन्न नाम चलेका अस्पताल वीर, टिचिङ, प्रसुतिगृह, पाटन, नर्भिक, अल्का, बिएन्डबी, काठमाण्डौं मोडल, काठमाण्डौं मेडिकल कलेज, निजामती र कान्तिका क्यान्टिनमा गरिएको निरिक्षणका क्रममा सो तथ्य फेला परेको हो । निरिक्षण गरिएका सबै अस्पतालका क्यान्टिन र अस्पतालका आसपासका रेस्टुरेन्टमा अन्डाका परिकार बिक्री गरिरहेको पाइएको हो ।