समाचार » जुम्ल्याहाले जुम्ल्याहासँगै बिहे गरे

कञ्चनपुर – जुम्ल्याहा दाजुभाइले एकै घरकी जुम्ल्याहा दिदी बहिनीसित एकै दिन विवाह गरेका छन्। पिपलाडी–९ गर्जमुनिका जुम्ल्याहा दाजुभाइ रामप्रसाद निरौला र लक्ष्मण निरौलाले झलारी कसरौलकी दिदी बहिनी सीता भट्ट र पार्वती भट्टसित लगनगाँठो कसेका हुन्। दुई दुलाहा र दुई दुलहीको विवाह हेर्न भट्टको घरमा छिमेकी गाउँसम्मका बासिन्दा ओइरिएका थिए। चार दिनअघि एकै यज्ञमा दुवै जोडी विवाह बन्धनमा बाँधिएका हुन्। गर्जमुनिका भोजराज निरौला र धर्मादेवी निरौलाका जुम्ल्याहा छोरा २०४७ सालमा जन्मिएका थिए। यसैगरी मदनराज भट्ट र लक्ष्मीदेवी भट्टका दुवै छोरी विसं २०४८ मा जन्मिएका हुन्। "जुम्ल्याहा विवाह त धेरै सुनिए, एकै घरमा दिदी बहिनीसित विवाह गरेको यहाँ पहिलोपटक हो" पिपलाडीका परमानन्द पन्तले भने, "यो संयोग हो।" विवाहपछि रामकी सीता र लक्ष्मणकी पार्वती भनेर गाउँमा नव विवाहित दम्पतीलाई भन्न थालिएको छ। रासस भिडियोको लागी तल क्लिक गर्नुहोला >>>

Labels: समाचार