सर्वोच्च अदालतमा सम्मानित प्रधानन्यायाधीश पदमा काम गरिरहेका रेग्मीलाई चार दलका नेताहरुले पटक-पटक फकाएर दुई महिनाअघि मन्त्रिपरिषदको अध्यक्ष पद जिम्मा लगाएका हुन् । तर, सरकार जिम्मा लगाउने चार दलका यिनै नेताहरुले यतिबेला रेग्मीलाई दुईतिरबाट विपरीत दिशामा तानिरहेका छन् । चारदलका नेताको तानातानका कारण रेग्मीका खुट्टा अघि सर्न सकिरहेका छैनन् । विशेष गरी निर्वाचनसम्बन्धी कानुनमा थ्रेसहोल्डको मापदण्ड राख्ने कि नराख्ने भन्नेमा चार दलमध्येका एमाले र कांग्रेसले थ्रेसहोल्ड राख्न रेग्मीलाई दबाव दिएका छन् भने एमाओवादी र मधेसी मोर्चाले चाँहि थ्रेसहोल्डको प्रावधान नराख्न दबाव दिइरहेका छन् । चारदलबाट आएको दोहोरो दबावकै कारण रेग्मी यतिबेला तनावमा हुनुहुन्छ ।

चार दिनअघि बल्खुमा आयोजित कांग्रेस र एमालेको बैठकले थ्रेसहोल्ड नहटाउनुपर्ने अडान दोहोर्यायो । त्यसलगत्तै दुई दलका नेताले रेग्मीलाई भेटेरै थ्रेसहोल्डबारे आफ्नो अडान राखे ।

कांग्रेस, एमालेको दुई दलीय बैठक र रेग्मीसँगको भेटपछि आफूहरुलाई ‘बाइपास’ गरेर रेग्मीलाई भड्काएको भन्दै एमाओवादी अध्यक्ष प्रचण्ड आक्रोशित बन्नुभएको छ । कांग्रेस र एमालेका नेताहरुको तर्कचाहिँ के छ भने बाधा अड्काऊ फुकाउने आदेशमा ४ सय ९१ सदस्यीय संविधानसभा रहने भनिएकोमा ६ सय १ नै राख्नुपर्छ भनेर एमाओवादीले बखेडा झिकेको छ ।

चार दलका शीर्षनेता आफैमा बाझाबाझ गर्न थालेपछि रेग्मी असन्तुष्ट बन्नुभएको हो । त्यसो त यसअघि अख्तियारमा लोकमानसिंह कार्कीको नियुक्ति प्रकरणमा पनि चार दलका नेताहरु यसैगरी दुई धारमा बाँडिएका थिए । त्यसबेला रेग्मीले बालुवाटारमा नेताहरुलाई बोलाएर यस्तै हो भने आफूले काम गर्न नसक्ने भन्दै घुक्र्याउनुभएको थियो ।

थ्रेसहोल्ड हटाउने रेग्मीको इच्छा

अध्यक्ष खिलराज रेग्मीले थ्रेसहोल्ड राख्ने कि नराख्ने भन्नेबारे दर्जनौं दलहरुसँग छलफल गरिसक्नुभएको छ । छलफलका क्रममा कांग्रेस र एमाले बाहेक सबै दलहरुले थ्रेसहोल्डको प्रावधान नराख्न रेग्मीलाई सुझाव दिएका छन् । संविधानसभामा बढीभन्दा बढीले सहभागी हुन् पाउन् भन्दै रेग्मीले थ्रेसहोल्डको प्रावधान हटाउने मानसिकता बनाउनुभएको स्रोतको दाबी छ । तर, संविधानसभाको संख्याको सम्बन्धमा चाहिँ बाधा अड्काऊ फुकाउने आदेशले नै ४ सय ९१ रहने किटान गरिसकेकाले त्यसैअनुरुप अघि बढ्ने रेग्मीको अडान रहेको बुझिएको छ । सम्भवतः आइतबार रेग्मीले चारदलका नेतासँग यसबारे निर्णायक कुरा गर्नुहुनेछ ।

रेग्मीको चाहना चारदलबाट स्वतन्त्र हुने

अध्यक्ष रेग्मी आफ्नो सरकारमा चार दलको छायाँ नदेखियोस् भन्ने चाहनुहुन्छ । चारदल बाहेकका अन्य दलले सरकारलाई चार दलको छायाँ नबनाउन माग गरिरहेको र रेग्मी आफैंले पनि चारदलको कठपुतली हैन भन्ने देखाउनका लागि उहाँ चारदलका नेताहरुको हस्तक्षेपप्रति खुशी हुनुहुन्न ।

शुक्रबार आयोजित उच्चस्तरीय राजनीतिक समितिको बैठकले चुनावको मिति घोषणा नभएकोमा रेग्मीलाई स्पष्टीकरण सोध्ने निर्णय गरेको समाचार बाहिर आएपछि रेग्मी नेताहरुसँग थप रुष्ट हुनुभएको छ । चार दलकै विवादका कारण चुनावको मिति तोक्न ढिलाइ भएको रेग्मीले जवाफ दिनुभएको छ । शनिबार राजधानीमा वुद्ध जयन्तीमा आयोजित कार्यक्रममा रेग्मीले चुनावको मिति तोक्न ढिलाइ हुनुमा चार दल नै कारक रहेको बताउनुभयो ।

Labels: समाचार