अनुमति बिना तिब्बतीयन शरणार्थीलाई बाहिर पठाए क्याम्पका सञ्चालकलाई कारबाही हुने


२५ वैशाख, काठमाण्डौं । काठमाडौं उपत्यकामा रहेका तिब्बतीयन शरणार्थी क्याम्पका सञ्चालकहरू प्रहरीको उच्च निगरानीमा परेका छन् । १५ दिनअघि भारतस्थित तिब्बती धार्मिक नेता दलाई लामाको धर्मशालाबाट तिब्बतीयन नागरिक सयौंको संख्यामा काठमाडौं प्रवेश गरेको सूचना पाएलगत्तै प्रहरीले क्याम्प सञ्चालकहरूलाई उच्च निगरानीमा राखेको हो । प्रहरी प्रधान कार्यालयस्थित उच्च स्रोतका अनुसार भारतबाट आएका तिब्बतीयन नागरिकहरू बौद्धस्थित खम्पा क्याम्प, कपन गुम्बा, सेचेन गुम्बा र ह्यान्डीक्राफ्ट सेन्टर एकान्तकुनामा बसेको सूचनाका आधारमा प्रहरीले उपत्यकामा रहेका १३ ओटा क्याम्प सञ्चालकहरूलाई निगरानीमा राखेको हो । ‘नेपालमा स्वतन्त्र तिब्बतको गतिविधि बढाउन र शान्ति सुरक्षामा नकारात्मक असर पार्ने योजनासहित आएको सूचनाका आधारमा निगरानी बढाइएको हो,’ प्रहरी प्रधान कार्यालय स्रोतले भन्यो राजधानी दैनिकमा खबर छ । क्याम्प सञ्चालकमध्ये केहीलाई बोलाएर प्रहरीले नेपालमा बसेर चीनविरोधी गतिविधि नगर्न चेतावनीसमेत दिएको छ । प्रहरीले भारतबाट आएका तिब्बतीको विवरण उपलब्ध गराउनसमेत निर्देशन दिएको स्रोतको भनाइ छ । तर, क्याम्प सञ्चालहरूले भारतबाट नेपाल आएको तिब्बती नागरिक पाहुनाका रूपमा घुम्न आएकाले उनीहरूबाट नेपालमा चीनविरोधी गतिविधि नहुने बताएका थिए । महानगरीय प्रहरी आयुक्त प्रहरी अतिरिक्त महानिरीक्षक (एआईजी) नवराज ढकालले नेपालको ऐन–कानुन उल्लंघन गर्ने शरणार्थीहरूलाई कारबाही गरिने बताए । ‘हामीलाई केही दिनअघि आएको सूचनाका आधारमा तिब्बतीयन शरणार्थी क्याम्प सञ्चालकहरूको गतिविधिलाई निगरानीमा राखेका छौं,’ एआईजी ढकालले भने । भारतको धर्मशालाबाट शरणार्थीहरू आएको सूचनासँगै प्रहरीले काठमाडौंमा रहेका २ हजार ४० शरणार्थीको गतिविधिमा पनि निगरानी सुरु गरेको छ । बौद्ध क्षेत्रमा रहेका सातओटा क्याम्पमा भने विशेष निगरानी बढाएको छ ।
भिडियोको लागी तल क्लिक गर्नुहोला

0 comments

Write Down Your Responses

Newer Post Older Post Home
Powered by Blogger.