समाचार » नेपाली शब्दकोषमा ४० हजार शब्द थपिँदै

काठमाण्डौं । पूर्वी नेपालमा ‘तोङ्वा’ को अर्थ नबुझ्ने कमै छन् । तर पश्चिम नेपालमा यसको अर्थ बुझ्ने निकै कम होलान् । ‘उगेप्से’ शब्दको अर्थ बुझ्ने नेपालीको संख्या पनि कमै होला । बराम भाषामा ‘उगेप्से’ को अर्थ ‘नमस्कार’ वा ‘स्वागत’ हुन्छ । अब नेपाली बृहत् शब्दकोषमा नेपाली भाषाका मात्र होइन, नेपालमा बोलिने शब्द पनि समेटिने भएको छ ।

नेपाल प्रज्ञा प्रतिष्ठानले शब्दकोषको नवौं संस्करणमा ४० हजार नयाँ शब्द थप्न लागेको उपकुलपति गंगाप्रसाद उप्रेतीले जानकारी दिएको अन्नपूर्ण पोष्टमा खबर छ । नेपाली वृहत शब्दकोष अद्यावधिक समितिका संयोजकसमेत रहेका उप्रेतीले भने, ‘दुई बर्षदेखि शब्दकोषको नयाँ संस्करण निकाल्ने तयारीमा छौं, यसमा नेपालभित्र मातृभाषा र नेपालबाहिर बस्ने नेपालीले प्रयोग गर्ने करिब ४० हजार शब्द थपिने छन् ।’

प्रतिष्ठानले २०४० सालमा पहिलो पटक करिब ६० हजार शब्दको नेपाली बृहत शब्दकोष प्रकाशन गरेको थियो । अव शब्दकोषमा एक लाख शब्द हुने भएका छन् । शब्दकोष अद्यावधिक समितिमा भाषाविद्हरु चुडामणी बन्धू, माधवप्रसाद पोखरेल, तारानाथ शर्मा र जीवेन्द्रदेव गिरी सदस्य छन् ।