१५ साउन, काठमाडौं । राजधानीमा जारी साफ यू–१६ च्याम्पियनसिप फुटवलको उपाधिका लागि नेपाल आज भारतसंग भिड्दैछ ।

त्रिपुरेश्वरस्थित दरशरथ रंगशालामा अपराह्न साढे ३ बजेपछि हुने खेलमा नेपाल भारतको चुनौती समाप्त पार्दै इतिहास रच्ने दाउँमा छ । प्रतियोगितामा भारतको तुलनामा शारीरिक र प्राविधिक रुपले उत्कृष्ट प्रदर्शन गरेको नेपाललाई उपाधिको दाबेदार मानिएको छ ।

आज भारतलाई पराजित गर्न सके दुई दशकमा नेपालले फुटबलमा पहिलो उपाधि हात पार्नेछ । १९९३ मा ढाकामा भएको साफमा नेपाली टोलीले स्वर्णजिते यता नेपाल पहिलो भएको छैन । काठमाडौंमा भएको १९९९ को साफको फाइनलमा नेपाल बंगलादेशसँग पराजित भएको थियो । २० वर्षअघि ढाकामा स्वर्ण जित्दा मिडफिल्डर रहेका बालगोपाल मर्हजन अहिले यू–१६ नेपाली टोलीको प्रशिक्षक छन् ।

नेपालले आज सुरुवाटै आक्रमक खेल खेल्ने प्रशिक्षक बालगोपाल महर्जनले बताएका छन् । छ नेपालको एक मात्र लक्ष्य उपाधि भएको तर, भारत बलियो प्रतिद्वन्द्वी भएकाले कम नआँकेको उनले बताए । फाइनलसम्मको यात्रा तय गर्ने क्रममा २ गोल खाएको नेपालले १६ गोल गरेको छ ।

अघिल्लो संस्करणको सेमिफाइनलमा नेपाल भारतसँग टाइब्रेकरमा पराजित भएको थियो । भारतलाई हराउँदै पहिलो संस्करणको उपाधि पाकिस्तानले जितेको थियो । नेपाल भने तेस्रो भएको थियो ।

यस पटक फाइनल प्रवेश गर्नेक्रममा नेपालले बंगलादेशलाई हराएको थियो भने भारतले अफगानिस्तानलाई स्तब्ध पारेको थियो ।