तीन सयभन्दा बढी फिल्ममा मुख्य भूमिका खेलिसकेर एउटा इतिहास कोरिसकेका अभिनेता राजेश हमाल साउन ३२ मा रिलिज हुन लागेको 'किन किन' बाट खबरमा छन् । एडल्ट सर्टिफिकेट पाएको उक्त फिल्मको प्रोमोमा उनी एउटी युवतीको न्युड पेन्टिङ बनाइरहेको अवस्थामा देखिएका छन् । पछिल्ला वर्ष अश्लील फिल्म बन्ने र चल्ने क्रम ह्वात्तै बढिरहेका बेला आएको राजेश अभिनीत यो फिल्मबाट पनि दर्शकहरू ढुक्क भने देखिएका छैनन् । तर पूरा फिल्म हेरिसकेका राजेश भने फिल्म भल्गर नभएको ठोकुवा गर्छन् । यति बेला उनी निकट भविष्यमा हुन लागेको विवाहले भन्दा पनि उक्त फिल्ममा गरेको अभिनयले बढी चर्चामा छन् । मिल्यो भने उनी प्रेमिका मधु भट्टराईकै साथ 'किन किन' हेर्ने सुरमा छन् । 

 अचेल झन्-झन् युवा देखिनुभएको छ ?

नजिकका पनि त्यसै भन्छन् । प्रायः मान्छे उमेरभन्दा चाँडै बूढा हुन्छ । जथाभावी खाने, एक्सरसाइज नगर्ने, रक्सी/चुरोट खाने र अनुशासित नहुने कारणले प्रायः मान्छे छिटै बूढा हुने गर्छन् । यी कुरामा ध्यान दिने हो भने लामो समय तन्दुरुस्त देखिन्छ । म आफू पनि त्यो मामिलामा अनुशासित भएकोले जवान देखिएको हुँ । स्वस्थ रहन के खानेभन्दा पनि के नखाने भनेर ख्याल राख्नुपर्छ । मद्यपान, धूमपान गर्नु भएन । चिप्लोचाप्लो खानु भएन । नियमित व्यायाम गर्नुपर्‍यो । हुन त अहिलेको वातावरण नै यस्तो छ कि, आफु अनुशासित भएर पनि नहुने छ । पानीसमेत स्वच्छ पाइँदैन । मान्छे बिरामी भएकामा होइन कि, स्वस्थ भएर हिँडे भने आश्चर्य हुनुपर्ने अवस्था छ ।

विडम्बना भन्नुपर्छ, यति बेलाका केही फिल्मले युवायुवतीको सम्बन्धको क्रियालाई नै क्रूर रूपले प्रदर्शन गरी बदनाम गरिरहेका छन् । केटाकेटीले आत्मीय सम्बन्ध दर्साउने त्यो किसिङ होस् वा शारीरिक आत्मीयता, आफैंमा खराब होइन । केहीले त्यसैलाई यति क्रूर र भल्गर किसिमले पस्किए कि, किसिङ सिन राख्नेबित्तिकै भल्गर फिल्म भनेर बदनामी भयो । यो त भावना व्यक्त गर्ने चरम सिमाना हो नि । त्यसैले फिल्ममा किसिङ हुनु हुँदैन, संवेदनशील भावना प्रकट गर्न हुँदैन भन्ने पक्षमा म छैन । यी कुरा त समाजमै हुने हुँदा फिल्ममा देखाउनबाट किन वञ्चित गर्ने ?

यो फिल्म प्रोमोका आधारमा दर्शकले कसरी बुझेका छन्, थाहा छैन । मैले विगतमा निर्वाह गरेका भूमिकाभन्दा एकदमै फरक छैन यो फिल्म । पहिले पनि मैले यस्तो दृश्य दिएकै हुँ । 'कसम' फिल्ममा गन्जी र हाफप्यान्ट लगाएर खोला किनारमा बीना बुढाथोकीसँग सिन दिएको थिएँ । 'शंकर' मा जल शाह र मेरो बेड सिन नै छ । तर त्यसलाई सही ढंगले प्रस्तुत गर्नपर्छ । 'किन किन' मा दृश्यहरू कलात्मक ढंगले पस्किइएको छ ।

तपाईंलाई अनेस्ट्ली भन्नुपर्दा, मधुजीको इच्छा मैले हरेक फिल्ममा किसिङ सिन गरौं भन्ने छैन । जहाँसम्म मैले बुझेको छु, उहाँको भित्री मनसाय यस्ता दृश्य नगर्दै ठीक भन्ने छ । तर पनि उहाँ मेरो पेसालाई बुझ्नुहुन्छ । प्रोमो हेरेर उहाँले त्यस्तो प्रतिक्रिया दिनुभएन । बरु फिल्म हेर्न इच्छा गर्नुभएको छ । नत्र उहाँमा विगतका केही (भल्गर) नेपाली फिल्म हेरेपछि 'तपाईंले त यस्ता फिल्म नगर्दा नि हुन्छ' भन्ने मनसाय पाएको थिएँ । तर अपसोस, फिल्म रिलिज हुँदासम्म हाम्रो विवाह भइसकेको भए त सँगै गएर हेर्नुहुन्थ्यो ।

अहिले नै मैले उहाँमा हक जमाउन त मिल्दैन नि । विवाह नभइसकेकी केटीलाई कसरी सँगै लैजानु ? उहाँमा बिहेपछि मात्रै मसँग देखिने पनि इच्छा होला । भेट्दै भेट्दैनौं भनेको त होइन नि । सार्वजनिक रूपमा पो नदेखिएका त । यही रेस्टुरेन्ट -इमागो डेई) मा हामी कति चोटि आएका छौं, तर तपाईंहरूलाई थाहा हुँदैन ।

यो समयसापेक्ष छ । उकेश दाहाल खालि केटाकेटीको संवेदनशील दृश्य देखाउने निर्देशक मात्रै नभएर मायाप्रीतिको मनोवैज्ञानिक ढंगले प्रस्तुत गर्ने निर्देशक पनि हुनुहुँदो रहेछ जस्तो लाग्यो । सम्बन्धलाई भल्गर हिसाबले भन्दा पनि सेक्सुअल साइक्लोजी, सेन्सिबल फिलिङसमा उतार्ने पाएँ । पात्र चयन सही लागेको छ । मसँग पहिलो फिल्म भएकोले सुटिङका बेला अरुणिमा लामाले कस्तो गर्नुहोला भन्ने सोचेको थिएँ, तर फिल्म हेरिसकेपछि उक्त चरित्रमा अरुणिमाभन्दा अरू सुहाउँथेनन् भन्ने लाग्यो । मेरो आफ्नै रोल पनि मबाहेक अरूलाई फिट हुन्थेन जस्तो लाग्यो । सम्बन्धलाई असाध्यै राम्रोसँग टि्रट गरिएको छ । दर्शकले केही नदेखेर पनि धेरै चीज त्यहाँ घटिसक्यो भन्ने ठान्नुहुन्छ । फिल्ममा दर्शकले भल्गर नलागीकनै भावनात्मक सम्बन्ध देख्न पाउनुहुन्छ । त्यहाँ किसिङ सिन पनि छैन । यदि हेरिसकेपछि दर्शकलाई कतै राजेश हमालले भल्गर गर्‍यो भन्ने लाग्यो भने म प्रतिक्रियालाई स्वागत गर्छु । फेस गर्न तयार छु । फिल्म मेकिङको नियतमा शंका छैन । पात्रको जीवनशैली अनुसार फिल्म बगेको छ ।