५ भदौ, काठमाण्डौं । नेताकी श्रीमतीले आफ्नो पतिको राजनीतिक जीवन र उद्देश्य बुझिनन् भने श्रीमानले राजनीतिक यात्रामा कतिसम्म आलोचनाको भार सहन गर्नुपर्ने हुन्छ भन्ने उदाहरण नेकपा-माओवादीका उपाध्यक्ष सीपी गजुरेल बनेका छन् ।

सानै उमेरमा बाहुनकी छोरीसँग वैवाहिक सम्बन्ध गाँसेका गजुरेलका लागि त्यही नै अभिसाप बनेको छ । कल्याणी एक त बाहुनकी छोरी, त्यसमाथि कट्टर धर्मभीरु र कडा मिजासकी छन् । अनि गजुरेल परे श्रीमतीको एक वचन पनि काट्न नसक्ने । पछिल्लो पटक गजुरेलले गत साउन २६ गतेको देखाएको क्रियाकलाप यतिबेला पार्टी पंक्तिभित्र चर्चा र आलोचनाको विषय बनेको छ ।

नागपञ्चमीको अघिल्लो दिन श्रीमतीको आदेश उल्लंघन गर्न नसकेपछि उनी साथ लागेर पछिपछि भक्तपुरस्थित डोलेश्वर महादेवको दर्शन गर्न पुगेका थिए । श्रीमतीको पछिल्तिर घन्टौ लाइनमा बसेर उनले पनि महादेवको दर्शन र प्रसाद ग्रहण गरेको बुधबार साप्ताहिकमा खबर छ । धेरै हल्लाखल्ला हुने डरले उनी अंगरक्षक र सवारी चालकलाई पनि पत्तो नदिई मन्दिर गएका थिए ।

सासूकै कारण बुहारीले सम्बन्ध विच्छेद गरिदिएपछि एक्लो बनेका छोरा सञ्जीवलार्ए गाडी चलाउन लगाएर त्यसदिन उनीहरु मन्दिर पुगेका थिए । पार्टीको महाधिवेशनका बेला गगल्स् लगाएर गाडीमा ओहोरदोहोर गर्दै गजुरेल पत्नीले देखाएको रवाफको चर्चा पार्टीपंक्तिमा सेलाउन नपाउँदै मन्दिरको चर्चा सुरु भएको छ ।