६ वैशाख, धनकुटा । कृषकले सडकमा डोर्‍याएको पशुलाई झट्ट हेर्दा खच्चड घोडाजस्तै देखिन्थ्यो । सोधखोज र मोलतोल गर्नेको चासो उत्तिकै थियो । बिहीबार धनकुटा सदरमुकामस्थित हुलाक टोलमा धनकुटा ५, माथिल्लो कोप्चेका दिलबहादुर मगरले ५ फिटभन्दा अग्लो ‘बाकटे’ खसी डोर्‍याउँदै हिँडेको दृश्य हो यो ।

मोल गर्ने क्रममा बढाबढ नै भयो । २५ हजारसम्म मूल्य दिने ग्राहक आए पनि मगर चित्त बुझेन । खसीको तौल ६५ किलोग्राम थियो । तौलअनुसारको मूल्यभन्दा आफ्नो लगानी चित्तबुझ्दो नभएपछि मगरले खसीलाई झापाको बिर्तामोर्डमा माग भएकाले उतै लैजाने बताए । ‘त्यहाँ भनेजस्तै मूल्य पाइन्छ कि,’ उनले भने ‘कम्तीमा ३० हजारसम्म दिए बेच्नेछु ।’

चार वर्ष पालेर बिक्री गर्न लागिएको कृषकले बताए । पछिल्लो समय स्थानीय र जामुनापारी जातको मिश्रति गरिएको वर्णाशंकर खसीबाख्रा पाल्न कृषकको चासो बढेको जनाइएको छ । सदरमुकाम आसपास तथा अर्खौले जीतपुर, तेलिया, ताखुंवाललगायतका स्थानमा उक्त जातका खसीबाख्रा पालन गरिने क्रम बढेको छ । वर्णाशंकर खसीको मासु मीठो हुने भएपछि यसको माग बढ्दै गएको अखौंले जीतपुरका कृषक रामचन्द्र पौडेलले बताए कान्तिपुरमा खबर छ ।

उक्त जातलाई कृषकले बाकटे भन्ने गरेपनि सिजाली तथा जमुनापारी पनि भन्न सकिने पशुसेवा कार्यालयले जनाएको छ ।