अख्तियार दुरुपयोग अनुसन्धान आयोगले पीडित राईसँग कर्मचारीहरुले लिएको २ लाख २५ हजार ४ सय ६५ रुपैयाँ असुल उपर गराउन र भ्रष्टाचार निवारण ऐन, २०५९ को दफा ३(१) र दफा ३(१) -घ) अनुसार कारबाहीको माग गर्दै मंगलबार विशेष अदालतमा मुद्दा दायर गरेको हो । आयोगको उजुरीमा अध्यागमन अधिकृत रामप्रसाद कोइराला, शाखा अधिकृत टिकाराज पोखरेल, ना.सु. सोमनाथ खनाल र अध्यागमन विभागको सुरक्षा पोष्टका प्रहरी जवान पर्शुराम बस्नेतविरुद्व मुद्दा दायर भएको विशेष अदालतका रजिष्ट्रार धिरबहादुर चन्दले जानकारी दिनुभयो ।

सोमनाथ र बस्नेत ठगी मुद्दामा यतिबेला कारगारमा छन् भने कोइराला र पोखरेल फरार छन् । अख्तियारले अध्यागमन विभागका तत्कालीन महानिर्देशक सुरेश अधिकारी र तत्कालीन निर्देशक लेखनाथ पोखरेललाई निजामती सेवा ऐन, २०४९ र निजामती सेवा नियमावली बमोजिम विभागीय कारवाहीका लागि सम्बन्धित मन्त्रालयमा लेखी पठाइएको छ ।

रोजगारीबाट फर्किएकी सीता राई (नाम परिवर्तन) बाट कर्मचारीहरुले ८ हजार ५ सय साउदी रियाल (ने रु. १,९८,३०५) घुस लिएका थिए । उनलाई घर पठाउन बसपार्कसम्म लैजाँदा निजको साउदी रियाल ८ सय, घडी र सेन्ट लिएका थिए भने प्रहरी हवल्दार पर्शुराम बस्नेतले एक होटलमा लगेर बलात्कारसमेत गरेको पीडितको आरोप छ ।