गएको बैशाख १४ गते सप्तरीको कन्चनपुरमा रहेको पसलमा सामान किन्न आएकी १० वर्षकी वालिकालाई बलात्कार गरेको आरोप लागेका हरेन्द्र देवले आरोप स्वीकार गरेपनि अस्पतालकै रिपोर्टका कारण अन्यौल भएको छ ।

अस्पतालले एक साता लगाएर तयार गरेको रिपोर्टमा बलात्कार भएको भनेर प्रष्ट नभन्दा समस्या देखिएको स्थानीयबासिन्दाले बताएका छन् ।

खैनी किन्न गएकी बालिका देवकै घर नजिकै अचेत अवस्थामा भेटिएकी थिइन् । बालिकाले होसमा आएपछि दिएको जानकारीका आधारमा प्रहरीले देवलाई भारदहबाट पक्राउ गरेको थियो । देव अहिले जिल्ला प्रहरी कार्यालय सप्तरीको नियन्त्रणमा छन् ।

अस्पतालका डा. शैलेशकुमार झासहित पाँच जना वरिष्ठ चिकित्सकको टोलीले तयार पारेको मेडिकल रिपोर्टमा भने बालिकालाई केही नभएको उल्लेख गरिएको छ । रिपोर्टमा बालिकालाई बलात्कार भएको हो/होइन भन्ने कुरा उल्लेख नगर्दा आरोपीलाई के कस्तो मुद्दा दायर गर्ने भन्ने विषयमा प्रहरीसमेत अन्यौलमा देखिएको छ ।

रिपोर्टमा पीडितलाई जबरजस्ती करणी भएको छ, छैन, यकिन साथ भन्न नसकिने उल्लेख छ । स्रोतका अनुसार मुद्दालाई दबाउन चिकित्सकहरुले त्यस्तो रिर्पोट तयार पारेर जिल्ला प्रहरी कार्यालयमा बुझाएका हुन् ।  

बलात्कारका आरोपी हरेन्द्र स्वास्थ्यकर्मी भएकै कारण मुद्दालाई कमजोर पार्दै पीडकलाई उन्मुक्ति दिन चिकित्सकहरुले यस्तो षड्यन्त्र गरेको पीडित परिवारको आरोप छ ।

पीडक देव सप्तरीको गोवरगाढा गाविसस्थित उपस्वास्थ्य चौकीको प्रमुखका पदमा कार्यरत छन् । बलात्कारको घटना लगत्तै त्यहाँ पुगेका स्थानीय बासिन्दाहरुले अचेत अवस्थामै पीडित बालिककाको उद्धार गरेका थिए । स्थानीय महिलाहरुले पीडित बालिकाको यौनांग सुन्निएको र रगताम्य भएको बताएका छन् । तर हाल अस्पतालको त्यस्तो रिपोर्ट बारे थाहा पाएपछि उनीहरु आक्रोशित भएका छन् ।

जिल्ला प्रहरी कार्यालय सप्तरी भन्ने पछिल्लो डेढ वर्ष यता बलात्कारबारेको मेडिकल रिपोर्टहरु यस्तै रहने गरेको जनाएको छ । जिल्ला प्रहरीस्थित मुद्दा फाँटमा लामो समयदेखि कार्यरत एक अनुसन्धान अधिकृतले भने ‘अस्पतालबाट आउने सबै रिपोर्टहरुमा अक्षर र कमा समेत फरक नपर्ने गरी यस्तै ढुलमुले रिपोर्ट आउने गरेको छ ।’

मेडिकल रिपोर्टका कारण पीडकलाई कारबाहीको दायरामा ल्याउन समेत समस्या हुने गरेको ती अनुसन्धान अधिकृतको गुनासो छ । डा. शैलेशकुमार झाले बलात्कारका केसमा तयार पार्ने मेडिकल रिपोर्टहरुमा यस्तै लेख्ने चलन रहेको बताउनुभयो ।

पीडक स्वास्थ्यकर्मी भएकाले बचाउन ढुलमुले रिपोर्ट तयार पार्नु भएको हो कि भन्ने जिज्ञासामा डा.झाले भन्नुभयो ‘हामीले पीडकबाट एक रुपैयाँ पनि खाएको छैन, न त कसैलाई जोगाउन खोजेका नै हौ ।’

बलात्कार आरोपी देवलाई उनकै ससुरा श्यामनारायण देवले छोरा बनाएर नेपाली नागरिकतासमेत दिलाएका छन् ।