२७ चैत, काठमाण्डौं । भनिन्छ नानीदेखि लागेको बानी हतपत्त छुट्न गाह्रो हुन्छ । हाल जेलमा रहेका काँग्रेस नेता खुमबहादुर खड्काको हकमा पनि यही उखान लागू भएको छ । पहिला प्रहरी र गुण्डालाई प्रयोग गरी अकूत सम्पत्ति कमाएका खड्का जेलबाट पनि अहिले असुलिरहेका छन् । तर पहिलेजस्तो सरुवा र बढुवा गरिदिन्छु भनेर नभई आफूलाई जेल बस्दा खर्च नभएको भन्दै उनले गुन्डासँग पैसा माग्ने गरेका हुन् । भ्रष्टाचार मुद्दामा अदालतले दोषी गरेपछि उनी विगत ६ महिनादेखि डिल्लीबजार कारागारमा बस्दै आएका छन् ।

मंगलबार प्रकाशित दृष्टि साप्ताहिकका अनुसार पहिला आफूले संरक्षण गरेको गुण्डागर्दीका नाइकेलाई जेलमै बोलाएर उनले खर्च माग्ने गरेका छन् । जेलमा धेरै खर्च हुने गरेको भन्दै पैसा असुल्ने गरेको स्रोतले बताएको छ । गुण्डाका नाइके मात्र नभई आफू निकट बहालवाला प्रहरीसँग समेत उनले सहयोग माग्ने गरेका छन् । खड्का गृहमन्त्री हुँदा सयौंलाई उनले प्रहरी र गुप्तचरमा जागिर लगाएका थिए । पार्टी निकट धेरै प्रहरी अधिकारीलाई उनले गुन लगाएका थिए ।

उनी जेल परेकै भोलिपल्ट किरण गौतम, कल्याण तिमल्सिनालगायतका तत्कालीन एआईजीहरु बिहानै उनलाई भेट्न जेल पुगेका थिए ।