अहिलेसम्म विवाह गर्नुभएन, किन ?

विवाह गर्ने उमेर बाँकी नै छ, किन हतार ?

प्रेमी छ ?

छैन। प्रेमी छाडेको पाँच वर्ष भैसक्यो। 

नयाँ ब्याइफ्रेन्ड बनाउनुभएको छैन ?

प्रेम र ब्याईफ्रेन्ड बनाएर बन्ने कुरा होइनन्, यो त अचानक भेट्ने कुरा हो। 

पहिलो प्रेमीलाई किन छाड्नुभयो ?

असमझदारी भएर। 

अहिले त्यो प्रेम सम्झदा कस्तो लाग्छ ?

दुःख लाग्छ। उसका बारेमा नराम्रो खबर मात्र सुन्नुपर्छ । उसको खराबीको कुरा सुन्दा आफैंलाई केटाकेटी सम्झन्छु । म किन पागल भएकी होला, त्यस्तो केटासँग म विवाह गर्ने सपना देख्थें। उसको प्रेममा रुन्थें। 

पश्चाताप छ ?

छैन, पहिले ममा नकारात्मक भावना थियो, अहिले सबै हटेर गएको छ। 

कसरी हट्यो ?

जय संगत भन्ने आध्यात्मिक संस्थामार्फत। त्यसमा हामी योग-ध्यान र जीवनलाई सही बाटोमा ल्याउने कुरा सिक्छौं, सिकाउँछौ। त्यसैले मनका विकार हटाए जस्तो लाग्छ। 

उमेर बढ्दै गएपछि त मानिस आफैं समझदार हुन्छ, होइन र ?

आफै विकार हट्नु र तप गरेर हटाउनुमा धेरै फरक हुन्छ। म इगोइस्ट केटी हुँ। चलचित्र क्षेत्रमा आउनुअघि म क्यासिनोमा काम गर्थे। जुवा खेल्नेहरूले मलाई जिस्क्याए भने एकै पटक हात छाडिहाल्थें। क्यासिनोमा काम गर्दा अलिकति होचो-अर्घेलो सहनुपर्छ भन्ने पनि हुँदैनथ्यो। 

रिसले जन्माएको कुनै घटना ?

क्यासिनामा काम गर्दा मैले तीनपल्ट रक्सीका मात्तिएका मान्छेलाई हात छाडें। पहिलोपटक मलाई सरी भन्न लगाइयो। दोस्रोपल्ट नसिहत दिइयो, तर तेस्रो व्यक्तिलाई पनि थप्पड हिर्काएपछि क्यासिनोले जागिरबाट निकाल्यो।

मानिसले थाहा नपाएको तपाईंको कुरा ?

म योग शिक्षक पनि हुँ। बिहान-बिहान ८४ व्यञ्जन परिकार रेस्टुराँ, पुरानो बानेश्वरमा योग सिकाउँछु। 

मानिसहरू योग सिक्न आउँछन् कि तपाईंको आकर्षक शरीर हेर्न ?

चर्को घाम लागेका बेला कतै रूख देखिएपछि मानिसहरू त्यसको ओत लाग्छन्। ओत लाग्दालाग्दै कसैले त्यो रूखको हाँगा भाँच्न सक्छन्, तर रूखले मेरो हाँगा किन भाँचिस् भन्छ र ? गलत नजर लगाउनेलाई म केही भन्दिन्, सद्बुद्धिको कामना गर्छु। 

जीवन लक्ष्य ?

मेरा एक छोरा र एक छोरी छन्। उनीहरुको भविष्य बनाउनु नै अहिलेको लक्ष हो। 

विवाह नभई आमाको भूमिका निर्वाह गर्दा उनीहरूप्रति न्याय गर्न सकिन्छ ?

उनीहरूलाई मैले जन्म दिएकी होइन, तर आमाले जति माया दिन सक्छिन्, त्यो दिएकी छु। कतिपयले जन्म दिएर बच्चा फालेका उदाहरण पनि छन्। जन्म नदिनेबित्तिकै न्याय गर्न सकिँदैन भन्ने होइन। 

त्यसो भए अब विवाह नगर्ने ?

विवाह हुन पनि सक्छ, तर अहिलेसम्म प्रेम नै भएको छैन, विवाह त धेरै परको कुरा हो।